टीम लोकमन बारामती |
बारामती लोकसभा मतदारसंघात महाविकास आघाडीचे उमेदवार खासदार सुप्रिया सुळे यांनी प्रचारात आघाडी घेतली असून त्यांच्या प्रचारासाठी आता खुद्द त्यांची उच्चशिक्षित कन्या रेवती सदानंद सुळे यांनी प्रचारात सक्रिय सहभाग घेतला असून बारामती मतदारसंघात झंजावती प्रसार सुरू केल्याने व पहिल्यांदाच त्या निवडणूक प्रचारात उतरल्याने संपूर्ण बारामती लोकसभा मतदारसंघात याची चर्चा होत आहे.
राज्याच्या राजकारणातील मातब्बर राजकीय घराणे असलेल्या बारामतीच्या पवार कुटुंबातील अजित पवारांनी वेगळी चूल मांडल्याने पवार कुटुंबात उभी फूट पडली. अजित पवारांनी भाजपशी सलगी करून उपमुख्यमंत्रीपद मिळवले. शरद पवारांचा राजकीय दबदबा संपवण्यासाठी भाजपने चंग बांधला असून वेगवेगळ्या पद्धतीने प्रयत्न भाजपकडून होताना दिसत आहे. अजित पवारांना आपल्याकडे घेऊन भाजपने पवारांना मोठा धक्का दिला आणि एकसंघ असलेल्या पवार कुटुंबात संघर्षाला सुरुवात झाली. लोकसभा निवडणुकीत सुप्रिया सुळे यांचा पराभव करून शरद पवारांच्या राजकीय अस्तित्वाला धक्का देण्यासाठी भाजपकडून जोरदार प्रयत्न होताना दिसत आहेत. ही निवडणूक पवार विरुद्ध पवार अशीच होत आहे.
लोकसभेची निवडणूक जाहीर झाल्यापासून बारामती लोकसभा मतदारसंघात मोठ्या राजकीय घडामोडी घडताना पाहायला मिळत आहेत. गेल्या कित्येक वर्षांपासून सुरू असलेला हर्षवर्धन पाटील आणि अजित पवार यांच्यातील संघर्ष संपुष्टात येऊन मनोमिलन झाले. अजित पवारांना टोकाचा विरोध करणारे माजी मंत्री विजय शिवतारे यांनीही तलवार मॅन करून अजितदादा सोबत जुळवून घेतले. तर दुसरीकडे मुरब्बी राजकारणी असलेल्या शरद पवारांनी गेल्या अनेक वर्षांपासून राजकीय विरोधक असणाऱ्या विरोधकांच्या भेटी घेऊन मनोमिलन घडवून आणले. या मतदारसंघातील अनेक मातब्बर नेते आपल्या गळाला लावले. बारामती लोकसभा मतदारसंघातील निवडणूक अतिशय प्रतिष्ठेची बनली असून संपूर्ण देशाचे लक्ष या मतदारसंघाकडे लागले आहे.
या निवडणुकीच्या प्रचारात युवा पिढी मोठ्या प्रमाणात सक्रिय झालेली दिसत असून सुनेत्रा पवारांच्या प्रचारासाठी त्यांचे पुत्र पार्थ आणि जय पवार हे मोठ्या ताकतीने उतरले आहेत तर सुप्रिया सुळेंच्या प्रचारात संपूर्ण पवार कुटुंब एक होऊन एकदिलाने काम करताना दिसत आहे. सुप्रिया सुळेंच्या प्रचारासाठी पवार कुटुंबातील युवा पिढी वायूवेगाने काम करत आहे. कर्जत जामखेडचे आमदार रोहित पवार, युगेंद्र पवार यांनी प्रचाराचा धुरळा उडवला असतानाच आता त्यात भर पडली आहे सुळेंच्या कन्येची. उच्चशिक्षित असलेल्या रेवती सुळे या आईसाठी मैदानात उतरल्या असून त्यांनी संपूर्ण बारामती लोकसभा मतदारसंघ पिंजून काढला आहे त्या पहिल्यांदाच निवडणुकीच्या प्रचारात उतरल्या आहेत.
रेवती सदानंद सुळे या सुप्रिया सुळे यांच्या कन्या असून त्या उच्चशिक्षित आहेत. लंडन स्कूल ऑफ इकॉनॉमिक्स मधून मास्टर झालेल्या रेवती आता आईसाठी गावागावात जाताना दिसत आहेत. यापूर्वी रेवती सुळे राजकीय कार्यक्रमांपासून अंतर ठेवून असायच्या पण सध्याच्या बदललेल्या राजकीय वातावरणात आईसाठी रेवती पूर्ण क्षमतेने मैदानात उतरलेल्या पाहायला मिळत आहेत.
बारामती लोकसभा मतदारसंघात सुनेत्रा पवार व सुप्रिया सुळे या उमेदवार असल्या तरी खरी लढत शरद पवार विरुद्ध भाजप अशीच आहे. ही निवडणूक भाजपने अतिशय प्रतिष्ठेची केली आहे. उपमुख्यमंत्री अजित पवार यांच्या अस्तित्वाची आणि शरद पवार यांच्या प्रतिष्ठेची ही निवडणूक असल्याने मोठी चुरस या निवडणुकीत निर्माण झाली आहे. प्रचारात दोन्ही बाजूने जोर दिसून येत आहे. सध्या तरी प्रचारात सुप्रिया सुळेंनी आघाडी घेतल्याचे चित्र दिसत आहे.
