टीम लोकमन मंगळवेढा |
संपूर्ण जगभरात महिला दिन मोठ्या उत्साहात साजरा करत असताना बीडमधून एक अतिशय धक्कादायक बातमी समोर आली आहे. महिला दिनाच्या दिवशीच बीडमध्ये पोलीस कर्मचाऱ्यांने बलात्कार केल्याची धक्कादायक घटना समोर आली आहे. यामुळे बीड पोलीस दलात खळबळ उडाली असून आरोपीला अटक करण्यात आली आहे.
बीडच्या पाटोदा पोलीस ठाण्यात कार्यरत असलेल्या कर्मचाऱ्यांने तक्रार देण्यासाठी आलेल्या महिलेची ओळख करत बलात्कार केल्याची घटना घडली आहे. उद्धव गडकर असे या नराधम आरोपी पोलीस कर्मचाऱ्याचे नाव आहे. या प्रकरणात आज पाटोदा शहर पोलीस ठाण्यात गुन्हा दाखल करण्यात आला असून आरोपीला अटक केल्याची माहिती ठाणे प्रमुख सोमनाथ जाधव यांनी दिली.
नागरिकांमध्ये पोलिसांबद्दल रोष वाढतोय…
सामान्य नागरिकांचे संरक्षण करण्याची ज्याच्यावर जबाबदारी असते तो पोलीस खात्यातील कर्मचारीच भक्षक बनल्याने मोठी खळबळ उडाली आहे. बीडमध्ये मागील काही दिवसांपासून पोलिसांचा वचक कमी होत चालल्याचे निदर्शनास येत आहे. काही प्रकरणांत पोलिसांचीच गुन्हेगारांसोबत उठ-बस असते. त्यामुळे सामान्य नागरिकांमध्ये पोलिसांची प्रतिमा मलीन होत चालली आहे. त्यातच आता हा प्रकार समोर आला आहे. त्यामुळे सामान्य नागरिकांमध्ये पोलिसांबद्दल रोष आणि गुन्हेगारांबद्दल भीतीचे वातावरण पसरले आहे.
पोलिसांच्या कामगिरीवरही प्रश्न उपस्थित होत आहेत
जिल्ह्यातील कायदा व सुव्यवस्था तर बिघडली आहेच. परंतु सामान्य नागरिकांसह महिला, मुलींची सुरक्षाही धोक्यात असल्याचे दिसत आहे. अगदी किरकोळ कारणावरूनही एकमेकांच्या जीवावर उठून कुऱ्हाड, कुकरी, तलवार, दगडाने ठेचून खून करत आहेत. डिसेंबर अखेरीस मस्साजोगचे सरपंच संतोष देशमुख यांची ज्या प्रकारे हत्या झाली त्याने तर बीडच नव्हे तर संपूर्ण महाराष्ट्र हादरला आहे. आता याचे पडसाद राज्यभर उमटले आहेत. या हत्यानंतर पोलिसांच्या कामगिरीवरही प्रश्न उपस्थित करण्यात आले आहे.
