टीम लोकमन मुंबई |
नाशिकचा भोंदूबाबा कॅप्टन अशोक खरात प्रकरणी राज्य महिला आयोगाच्या अध्यक्षा रुपाली चाकणकर यांनी काल राजीनामा दिला आहे. मुख्यमंत्री देवेंद्र फडणवीस यांनी चाकणकरांना राजीनामा देण्याचे आदेश दिल्यानंतर रूपाली चाकणकर यांनी उपमुख्यमंत्री सुनेत्रा पवारांकडे राज्य महिला आयोगाच्या अध्यक्षपदाचा राजीनामा सूपूर्त केला.
या प्रकरणाचा तपास महिला आयपीएस अधिकारी तेजस्विनी सातपुते यांच्या नेतृत्वातील एसआयटी करीत आहे. खरात आणि त्याच्या कार्यालयातील ऑफिस बॉय नीरज जाधव यांच्या मुसक्या आवळल्यानंतर एसआयटीने आता या प्रकरणात राजकीय धागेदोरे काय आहेत हे पाहण्यास सुरवात केली आहे.
उपमुख्यमंत्री एकनाथ शिंदे यांच्या शिवसेनेचे ज्येष्ठ नेते आणि माजी मंत्री दीपक केसरकर यांचा निकटवर्तीय दीपक लोंढे SIT चौकशीच्या फेऱ्यात अडकला आहे. त्याची कसून चौकशी सुरु असून लोंढे हा सिन्नरमध्ये जमीन खरेदी-विक्री व्यवसायात सक्रिय होता. लोंढेकडून मिळालेल्या माहितीनुसार पोलीस अशोक खरातच्या राजकीय आणि व्यावसायिक भागीदारांपर्यंत पोहचणार असल्याचे प्रथमदर्शी दिसत आहे.
भोंदूबाबा कॅप्टन अशोक खरात प्रकरणात राज्यातील कोणकोणत्या नेत्यांची नावे समोर येतात हे पाहणे रंजक ठरणार आहे. या प्रकरणाच्या सखोल चौकशीसाठी SIT स्थापन करण्यात आली असून त्याचे नेतृत्व राज्यातील धडाकेबाज महिला आयपीएस अधिकारी तेजस्विनी सातपुते यांच्याकडे असल्याने अनेकांचे धाबे दणाणले आहेत. राज्यातील अनेक महत्त्वांच्या प्रकरणांचा तपास तेजस्विनी सातपुते करीत आहेत.
