टीम लोकमन पुणे |
पुणे-सोलापूर महामार्गावर पाटसजवळ झालेल्या एका भीषण अपघाताने प्रवाशांच्या काळजाचा ठोका चुकला. सोलापूरहून पुण्याच्या दिशेने जाणाऱ्या महाराष्ट्र राज्य मार्ग परिवहन महामंडळाच्या बसला एका सुसाट कंटेनरने ओव्हरटेक करण्याच्या नादात जोरदार धडक दिली. ही धडक इतकी भीषण होती की एसटी बस महामार्गाच्या कडेला जाऊन थेट उलटली. मात्र या भीषण अपघातात बसमधील सर्व प्रवासी बचावले असून 44 प्रवासी मृत्यूच्या दाढेतून सुखरूप बाहेर पडले.
ओव्हरटेकिंगचा थरार आणि एसटीचा चक्काचूर…
मिळालेल्या माहितीनुसार, सोलापूर-पुणे ही महाराष्ट्र राज्य मार्ग परिवहन महामंडळाची बस आपल्या मार्गाने जात असताना एका भरधाव कंटेनरने चालकाच्या बाजूने ओव्हरटेक करण्याचा प्रयत्न केला. यावेळी कंटेनरची एसटीला इतकी जोरात धडक बसली की एसटी बस चालकाचे गाडीवरील नियंत्रण सुटले. महामार्गावर सध्या रुंदीकरणाचे काम सुरू असल्याने रस्त्याच्या कडेला जाऊन उलटली. बसच्या पुढच्या आणि मागच्या भागाचे मोठ्या प्रमाणात नुकसान झाले आहे.
स्थानिक देवदूतासारखे मदतीसाठी धावले…
अपघात होताच प्रवासी घाबरून मोठ्याने किंचाळले. बस पलटी झाल्याचे पाहताच जवळच असलेल्या हॉटेलमधील कर्मचारी आणि स्थानिक नागरिकांनी तात्काळ मदतीसाठी धाव घेतली. बसच्या खिडक्यांमधून आणि दरवाजातून प्रवाशांना सुखरूप बाहेर काढण्यात आले. सुदैवाने या अपघातात कोणतीही जीवितहानी झाली नाही. केवळ 2 ते 3 प्रवासी किरकोळ जखमी झाले आहेत. त्यांना उपचारासाठी रुग्णालयात दाखल करण्यात आले आणि प्राथमिक उपचारानंतर घरी सोडण्यात आले आहे. या भीषण अपघातात सुदैवाने 44 प्रवाशांचा जीव अगदी थोडक्यात वाचला.
