टीम लोकमन कोल्हापूर |
शेतात राबणाऱ्या कष्टकरी महिलेवर काळाने झडप घातल्याची धक्कादायक घटना हातकणंगले तालुक्यातील टोप येथे घडली आहे. शेतातील कडबा उचलत असताना झालेल्या घोणस जातीच्या सापाच्या दंशाने सुनीता सर्जेराव भोसले (वय 55) या महिलेचा उपचारादरम्यान मृत्यू झाला आहे. या घटनेमुळे संपूर्ण परिसरात शोककळा पसरली आहे.
उपलब्ध माहितीनुसार, सुनीता भोसले या नेहमीप्रमाणे बुधवार दिनांक 18 मार्च रोजी सकाळी बिरदेव मंदिराच्या पाठीमागे असलेल्या ‘भोसले खडी मळ्यातील’ आपल्या शेतात काम करण्यासाठी गेल्या होत्या. शेतात साठवून ठेवलेला कडबा त्या उचलत असताना पेंढ्याखाली दबा धरून बसलेल्या विषारी घोणस सापाने त्यांच्या पायाला जोरदार चावा घेतला.
सुनिता यांचा मदतीसाठी आरडाओरडा, पण….
आपल्याला सर्पदंश झाल्याचे लक्षात येताच सुनीता यांनी मदतीसाठी आरडाओरडा केला. जवळच काम करणाऱ्या ग्रामस्थांनी तात्काळ त्यांच्या दिशेने धाव घेतली. परिस्थितीचे गांभीर्य ओळखून त्यांना तातडीने जवळच्या रुग्णालयात उपचारासाठी दाखल करण्यात आले. मात्र घोणसचे विष अत्यंत तीव्र असल्याने ते काही वेळातच त्यांच्या शरीरात वेगाने पसरत गेले. डॉक्टरांनी शर्थीचे प्रयत्न केले मात्र दुपारच्या सुमारास सुनिता यांची प्राणज्योत मालवली.
शेतात काम करताना विशेषतः साठवलेला चारा किंवा लाकडे हलवताना शेतकऱ्यांनी संरक्षक बूट वापरणे आणि काठीचा वापर करणे आवश्यक असल्याचे मत जाणकारांकडून व्यक्त केले जात आहे.
