टीम लोकमन सांगली |
मिरज येथील पोलिस उपअधीक्षक कार्यालयात कार्यरत असलेल्या सहाय्यक पोलिस उपनिरीक्षकाचा संशयास्पद मृत्यू झाला असून बाळू मुसा डांगे (वय 55, मूळ आरळा, ता. शिराळा, सध्या कुपवाड फाटा, सांगली) असे त्यांचे नाव आहे. काल दुपारपासूनच ते कोणाच्याही संपर्कात नव्हते. त्यानंतर मिरज पंढरपूर रोडवर तानंग फाटा येथे मोटारीत त्यांचा मृतदेह आढळला. त्यांनी आत्महत्या केली की अन्य कोणत्या कारणाने त्यांचा मृत्यू झाला याबाबत माहिती मिळू शकली नाही. वरिष्ठ पोलिस अधिकाऱ्यांनी भेट देऊन या घटनेची माहिती घेतली.
पोलिसांकडून मिळालेली माहिती अशी की, सध्या सहाय्यक पोलिस उपनिरीक्षक पदावर कार्यरत असलेले बाळू डांगे यांची मिरज वाहतूक शाखेकडे नियुक्ती करण्यात आली होती. मात्र ते प्रतिनियुक्तीवर मिरज पोलिस उपअधीक्षक कार्यालयात कामकाजास होते. काल दुपारपासून कोणाच्याही संपर्कात नव्हते. कॉलही घेत नव्हते. त्यांचा मिरज शहरासह परिसरात शोध घेण्यात येत होता. डांगे यांचा संपर्क होत नसल्याने अखेर त्यांचे मोबाईल लोकेशन शोधण्यात आले. ते मिरज पंढरपूर रस्त्यावरील तानंग फाटा येथे असल्याचे समजले. त्यानंतर त्यांचे नातेवाईक व पोलिसही तानंग फाटा येथे गेले. तेथे मोटारीत ते बेशुद्धावस्थेत आढळले. त्यांना तातडीने उपचारासाठी मिरज येथील शासकीय रुग्णालयात दाखल करण्यात आले.
परंतु उपचारापूर्वीच त्यांचा मृत्यू झाल्याचे शासकीय रुग्णालयातील डॉक्टरांनी सांगितले. मृत्यूचे नेमके कारण काल रात्री उशिरापर्यंत समजले नव्हते. पोलिसही तपास करत आहेत. या घटनेची माहिती मिळताच सांगलीचे पोलिस अधीक्षक संदीप घुगे यांच्यासह वरिष्ठ पोलीस अधिकारी शासकीय रुग्णालयात दाखल झाले होते. यावेळी पोलीस कर्मचारीही मोठ्या संख्येने उपस्थित होते.
