टीम लोकमन मंगळवेढा |
मंगळवेढा तालुक्यातील अधिकारी व कर्मचारी यांच्या योगदानातून स्पर्धा परिक्षेची तयारी करणाऱ्या ग्रामीण भागातील विद्यार्थ्यांसाठी गेल्या दहा वर्षापासून अभ्यासिका सुरू करण्याचा एक चांगला विधायक उपक्रम सुरू केला आहे. या अभ्यासिकेमुळे शासनाच्या विविध विभागामध्ये तालुक्यातील शंभर विद्यार्थी यांची नियुक्ती झाली ही कौतुकास्पद बाब असून सदर अभ्यासिकेचा फायदा तालुक्यातील जास्तीत जास्त युवकांनी घ्यावा असे आवाहन सार्वजनिक बांधकाम विभागाचे सेवानिवृत्त कार्यकारी अभियंता चंद्रकांत ढगे यांनी केले.
मंगळवेढा तालुका अधिकारी व कर्मचारी संघाच्यावतीने दिवाळी पाडव्यानिमित्त आयोजित करण्यात आलेल्या स्नेह मेळाव्यामध्ये सेवानिवृत्त कार्यकारी अभियंता चंद्रकांत ढगे हे बोलत होते. यावेळी मंगळवेढा तालुका अधिकारी व कर्मचारी संघाचे अध्यक्ष प्रा. डॉ. विश्वनाथ शिंदे, एसआरए मुंबईचे सहसंचालक महेश आवताडे, वित्त व लेखा विभागाचे सहसंचालक शिरीष धनवे, नोंदणी उपमहानिरीक्षक अभयसिंह मोहिते, कर्मवीर भाऊराव पाटील विद्यापीठाचे कुलसचिव डॉ.विजय कुंभार, तहसीलदार आण्णाप्पा कनशेटटी, नगर भूमापन अधिकारी सिध्देश्वर घुले, तालुका कृषी अधिकारी मनिषा मिसाळ, पोलीस निरीक्षक शहाजी रूपनर, सहाय्यक निरीक्षक ज्ञानेश्वर धनवे, श्रीकृपा महिला अर्बन को-ऑप क्रेडिट सोसायटीचे व्यवस्थापक राहूल जाधव, वैद्यकीय अधिकारी डॉ. दत्ता शिंदे, उपकृषी अधिकारी प्रशांत काटे, सहाय्यक मोटार वाहन निरीक्षक बालाजी धनवे, प्रदिप बिराजदार, बँक ऑफ महाराष्ट्रचे मुख्य प्रबंधक श्रीशैल मेहरकर, प्रा. डॉ. अरूण शिंदे, प्रा. दौलतसिंग रजपूत, शाहीर रमेश खाडे, विलास आवताडे आदी उपस्थित होते.
प्रास्ताविकामध्ये मंगळवेढा तालुका अधिकारी व कर्मचारी संघाचे अध्यक्ष डॉ.विश्वनाथ शिंदे यांनी संघटनेच्या अधिकारी व कर्मचारी यांनी आपले योगदान देऊन गेल्या दहा वर्षात तालुक्यात विविध सामाजिक उपक्रम राबविले आहेत. विशेषतः स्पर्धा परिक्षेची तयारी करण्यासाठी सुरू करण्यात आलेल्या अभ्यासिका व ग्रंथालयामुळे तालुक्याच्या ग्रामीण भागातील युवकांसाठी उपयुक्त ठरला असल्याचे सांगीतले. यावेळी डॉ. दत्ता शिंदे, ज्येष्ठ विचारवंत प्रा. डॉ. अरूण शिंदे यांनीही मार्गदर्शन केले.
सदर स्नेह मेळाव्यामध्ये झालेल्या मंगळवेढा तालुका अधिकारी व कर्मचारी संघामध्ये सेवानिवृत्तांना सामावून घेऊन त्यांच्याकडे स्थानिक जबाबदारी सोपविण्यात यावी, पदवीपूर्व विद्यार्थ्यांना मार्गदर्शन व कार्यशाळेचे आयोजन करण्यात यावे. वेबसाइट तयार करणे, अभ्यासिकेतून अधिकारी झालेल्या विद्यार्थ्यांना सक्रीय करणे, विविध व्यावसायिक मार्गदर्शन आयोजन करणे, आरोग्याची काळजी घेण्यासाठी योग शिबीर आयोजित करणे, विविध सामाजिक उपक्रम राबविणे, संघटनेची डायरी तयार करणे आदींचे नियोजन करण्यात आले.
सप्तर्षी प्रकाशनच्या शब्द शिवार दिवाळी अंकाचे प्रकाशन उपस्थित मान्यवरांच्या हस्ते करण्यात आले. यावेळी पदोन्नती, उल्लेखनीय कार्य केलेल्या अधिकारी व कर्मचारी यांचा पुस्तक भेट देऊन सत्कार करण्यात याला. सदरचा कार्यक्रम यशस्वी करण्यासाठी संघटनेचे सचिव अजित शिंदे, उपाध्यक्ष मिलिंद आटकळे, सहसचिव सुर्यकांत तोडकरी, सचिन सोनवणे, मधुकिरण डोरले, दिपक कोकरे, डी. आर. लंगोटे यांचेसह श्रीकृपा महिला अर्बन को-ऑप क्रेडिट सोसायटीचे कर्मचारी यांनी परिश्रम घेतले. सदर कार्यक्रमाचे सूत्रसंचालन लेखाधिकारी अजित शिंदे यांनी केले तर सहाय्यक लेखाधिकारी सुर्यकांत तोडकरी यांनी आभार मानले.
