टीम लोकमन मंगळवेढा |
भारतीय सैन्य दलातील जवान आराई (ता. बागलाण) येथील सुपुत्र मनोहर आहिरे ‘ऑपरेशन सिंदूर’ मोहिमेत कर्तव्य बजावत असताना प्रतिकूल हवामानामुळे आजारी पडले. त्यांना तातडीने पुणे येथील लष्करी रुग्णालयात दाखल करण्यात आले होते. मात्र उपचारादरम्यान त्यांनी प्राणज्योत मालवली आहे.
त्यांचे पार्थिव पुणे येथून देवळाली कॅम्पमार्गे त्यांच्या मूळ गावी आणण्यात आले. लष्करी वाहनातून पार्थिव आल्यावर संपूर्ण गाव हंबरडा फोडून रडत होते. पत्नी, मुले, आई-वडील, भाऊ, मित्रपरिवार व नातलगांचा आक्रोश काळीज पिळवटून टाकणारा होता.
गावातील सुपुत्रास वीरमरण प्राप्त झाल्याने यंदा गावात पोळा सण साजरा झाला नाही. वीरमरण आलेल्या जवानाच्या पार्थिवावर ग्रामस्थांनी फुलांचा वर्षाव करत अंतिम दर्शन घेतले. अखेरच्या प्रवासात ‘वीर जवान अमर रहे’, ‘भारत माता की जय’, ‘वंदे मातरम्’च्या गगनभेदी घोषणा मोठ्या प्रमाणात घुमल्या. भरपावसातही हजारो लोकांनी गर्दी करत आपल्या लाडक्या वीर जवानास अश्रूपूर्ण निरोप दिला.
अंत्यसंस्कारावेळी देवळाली येथील आर्मीचे जवान पलक रजाक, आमदार दिलीप बोरसे, तहसीलदार कैलास चावडी, सटाण्याचे पोलिस उपनिरीक्षक अतुल बोरसे, सहाय्यक गटविकास अधिकारी भय्या सावंत, भाजपचे जिल्हाध्यक्ष नीलेश कचवे, मराठा विद्याप्रसारक समाज संस्थेचे माजी अध्यक्ष तुषार शेवाळे, सरपंच दिलीप सोनवणे आदी उपस्थित होते.
बागलाण तालुका माजी सैनिक संघटना, भाजप माजी सैनिक सेल, बागलाण ॲकॅडमी आदींनी वीरमरणप्राप्त जवानांना पुष्पचक्र अर्पण करून श्रद्धांजली वाहिली. नाशिक ग्रामीण आडगाव येथील तसेच सटाणा पोलिस दलाच्या सलामी पथकाने, तर सैन्य दलाच्या सलामी गार्डने तीन फायरिंग करून बिगुल वाजवत वीरमरण प्राप्त भारतीय सैन्य दलातील जवान मनोहर आहिरे यांना शासकीय इतमाप्रमाणे अखेरची मानवंदना दिली.
