टीम लोकमन मुंबई |
कांदिवली येथील आकुर्ली परिसरातून एक धक्कादायक बातमी उघडकीस आली असून म्हाडाचे उपनिबंधक बापू कटरे यांच्या पत्नीने घरातच आयुष्य संपवले आहे. पैशाच्या कारणावरून पती पत्नीमध्ये मोठा वाद झाल्याची माहिती कुटुंबियांनी दिली. वाद विकोपाला गेला. त्यानंतर कटरे यांच्या पत्नीने गळफास घेत आत्महत्या केली आहे. दिवसेंदिवस राज्यात विवाहित महिलांच्या आत्महत्यांच्या प्रकरणांमध्ये वाढ होत असतानाच म्हाडाच्या उपनिबंधकाच्या पत्नीने पतीसोबत झालेल्या वादातून टोकाचे पाऊल उचलल्यामुळे परिसरात खळबळ उडाली आहे.
रेणु कटरे (वय 44 वर्षे) असे मृत विवाहित महिलेचे नाव आहे. म्हाडाचे उपनिबंधक बापू कटरे यांच्या त्या पत्नी होत्या. रेणु आपल्या सासरच्यांसोबत मुंबईतील कांदिवलीतील आकुर्ली परिसरात राहत होत्या. त्या शिक्षिका असल्याची माहिती मिळत आहे. मिळालेल्या माहितीनुसार, दोघांमध्ये आर्थिक कारणावरून वारंवार वाद होत होते. वादाचे स्वरूप भांडणात झाले. शनिवारी दोघांमधील वाद विकोपाला गेला. त्यानंतर काही वेळातच त्यांनी आत्महत्या करण्याचा निर्णय घेतला. रेणु यांनी घरातच गळफास घेऊन आयुष्य संपवले. या घटनेनंतर रेणु कटरे यांचे भाऊ ॲड. नितीन शेवाळ यांनी समतानगर पोलीस ठाण्यात धाव घेतली असून तक्रार देण्याची प्रक्रिया सुरू केली आहे.
त्यांनी यावेळी रेणु कटरे यांच्या सासरच्यांवर गंभीर आरोप केले आहेत. आत्महत्या नसून हत्या असल्याचा संशय त्यांनी व्यक्त केला आहे. बहिणीचा छळ झाल्याचे त्यांनी म्हटले आहे. समतानगर पोलिसांनी या प्रकरणी आकस्मिक मृत्यूची नोंद केली आहे. तसेच घटनास्थळी पंचनामा करून पोलिसांनी मृतदेह शवविच्छेदनासाठी पाठवला आहे. आत्महत्या करण्यामागचे नेमके कारण काय? याचा अधिक तपास पोलिसांकडून सुरू करण्यात आला आहे.
