टीम लोकमन मंगळवेढा |
मेहकर पंढरपूर पालखी महामार्गावरील तेलगाव-माजलगाव रस्त्यावर भीषण अपघात झाला असून या अपघातात पाच जणांचा मृत्यू झाला आहे. रविवारी रात्री 11 वाजण्याच्या दरम्यान हा अपघात झाला असल्याची माहिती आहे. या अपघातात तिघांचा जागीच मृत्यू झाला तर दोघांचा हॉस्पिटलमध्ये उपचार सुरू असताना मृत्यू झाला आहे. यातील एका गंभीर जखमी असलेल्या महिलेवर छत्रपती संभाजीनगर येथे उपचार सुरु होते.
दरम्यान, सोमवारी (2 जून) सकाळच्या सुमारास तिचे निधन झाल्याची माहिती मिळत आहे. मृतांमध्ये पती-पत्नीचा समावेश आहे. हा अपघात एवढा भीषण होता की आयशरने ऑटोला जवळपास 50 ते 60 फूट अंतरापर्यंत फरफटत नेले होते. अपघातानंतर घटनास्थळी दिंद्रुड पोलीस तात्काळ दाखल झाले. यात फारूक चाँद सय्यद, त्यांच्या पत्नी सय्यद शबाना फारूक आमि शेख नोहिद एजाज या तिघांचा जागीच मृत्यू झाला. तर फैजान रफिक सय्यद याचे माजलगाव येथील रूग्णालयात निधन झाले. या अपघातात गंभीर जखमी असलेली महिला फरीदा अन्वर पठाण हिचा छत्रपती संभाजीनगर येथे मृत्यू झाला आहे.
घटनेनंतर आयशर चालक घटनास्थळावरून पसार झाला आहे. अपघाताची माहिती मिळताच दिंद्रुड पोलीस ठाण्याचे सपोनि महादेव ढाकणे यांच्यासह पोलीस कर्मचारी महेश साळुंखे, खलील मोमीन, सचिन गायकवाड, कानदास बनसोडे, चामनर हे तात्काळ घटनास्थळी दाखल झाले. सध्या प्रकरणाचा अधिक तपास पोलिसांकडून सुरु आहे.
