टीम लोकमन लातूर |
राज्यातील अपघातांच्या घटनांमध्ये वाढ झाली असून रस्ते अपघाताचे प्रमाण मोठ्या प्रमाणात वाढल्याचे पहायला मिळत आहे. गेल्या काही दिवसांत सातत्याने अपघाताचे वृत्त माध्यमांत झळकत आहे. आता राष्ट्रीय महामार्ग क्रमांक 361 वरील बेलकुंड उड्डाणपूल वरून जात असताना गाडी स्लिप होऊन सुरक्षा कठडा तोडून चारवेळेस पलटी झाल्याने भीषण अपघाताची घटना घडली आहे.
या अपघातात माजी आमदार आर.टी. देशमुख यांचे निधन झाले आहे. अपघातानंतर त्यांना उपचारासाठी लातूर येथे पाठवण्यात आले होते. लातूर येथील सह्याद्री हॉस्पिटलमध्ये त्यांच्यावर उपचार सुरू असतानाच त्यांची प्राणजोत मालवली. बीडचे खासदार बजरंग सोनवणे यांनी याबाबत फेसबुकवर पोस्ट करुन श्रद्धांजली अर्पण केली आहे.
बीड जिल्ह्यातील माजलगावचे माजी आमदार आर टी देशमुख यांच्या गाडीला लातूर तुळजापूर रस्त्यावरील बेलकुंड येथे अपघात झाला आहे. या अपघातात माजी आमदार आर. टी. देशमुख हे गंभीर जखमी झाले होते. त्यांना उपचारासाठी तात्काळ लातूरच्या सह्याद्री हॉस्पिटलमध्ये हलवण्यात आले. मात्र उपचारादरम्यान त्यांचा मृत्यू झाला. या घटनेची माहिती मिळताच मंत्री पंकजा मुंडे तात्काळ आपले सर्व कार्यक्रम रद्द करुन लातूरकडे रवाना झाल्या आहेत.
मंत्री पंकजा मुंडे सर्व कार्यक्रम रद्द करत लातूरकडे रवाना
राज्याच्या पर्यावरण व पशुसंवर्धन मंत्री पंकजा मुंडे या केंद्रीय गृहमंत्री अमित शहा यांच्यासोबत नांदेड येथील कार्यक्रमात असतानाच त्यांना ही माहिती कळाली. त्यानंतर तातडीने त्यांनी आपले सर्व कार्यक्रम रद्द करत नांदेडहून लातूरकडे प्रस्थान केले. आर टी देशमुख यांच्या कुटुंबीयांशी संवाद साधत त्यांनी धीर दिला. तसेच सह्याद्री हॉस्पिटलच्या डॉ. किनीकर यांच्याशीही भ्रमणध्वनी वरून संवाद साधून माहिती घेतली.
खासदार बजरंग सोनवणेंकडून श्रद्धांजली
लातूर जिल्ह्यात घडलेल्या भीषण अपघातात माजलगाव मतदारसंघाचे माजी आमदार आदरणीय आर. टी. देशमुख यांचे दु:खद निधन झाले. जीजांच्या जाण्याने बीड जिल्ह्याच्या सामाजिक आणि राजकीय क्षेत्राची मोठी हानी झाली आहे. त्यांच्या पवित्र स्मृतीस भावपूर्ण श्रद्धांजली. असे बजरंग सोनवणे यांनी म्हटले आहे.
