टीम लोकमन मंगळवेढा |
कुटुंबात चारचाकी वाहन असलेल्या महिलांना लाडकी बहीण योजनेचा लाभ मिळणार नाही असे सुरुवातीपासूनच स्पष्ट करण्यात आले होते. मात्र या निकषाकडे दुर्लक्ष करून अनेक सदन महिलांनी या योजनेचा लाभ घेतला आहे. शासनाने उपप्रादेशिक परिवहन अधिकारी कार्यालयाचा आधार घेत चारचाकी वाहन असलेली यादी घेऊन लाडकी बहीण योजनेत सहभागी असलेल्या घरांचा आढावा घेण्याचे काम सुरू केले आहे. अंगणवाडी सेविका घरोघरी जाऊन यासंदर्भात तपासणी करत आहेत.
लातूर जिल्ह्यात आत्तापर्यंत 4 हजार 398 महिलांच्या घरी जाऊन तपासणी करण्यात आली आहे. त्यात 2 हजार 673 महिलांच्या कुटुंबात चारचाकी वाहन असल्याचे या तपासणी दरम्यान निदर्शनास आले आहे. महिला बालकल्याण विभागाकडे 11 हजार अर्ज तपासणीसाठी आले आहेत. 10 हजार 794 लाडकी बहीण योजनेतील महिलांकडे चारचाकी असल्याचे निदर्शनास आल्याने ती यादी प्रत्यक्ष तपासणीसाठी महिला व बालकल्याण विभागाकडे पाठवण्यात आली आहे.
महिला व बालकल्याण विभागाने तालुका निहाय यादी तयार करून ती अंगणवाडी सेविकांकडे प्रत्यक्ष तपासणीसाठी सोपवण्यात आली आहे व अंगणवाडी सेविका प्रत्येक लाभार्थीच्या घरोघरी जाऊन पडताळणी करत आहेत. तपासणीत चारचाकी असल्याचे निदर्शनास आल्यास ती नावे मुख्यमंत्री लाडकी बहीण योजनेतून वगळण्यात येणार आहेत. शासनाच्या आदेशाप्रमाणे अंगणवाडी सेविकांमार्फत पडताळणी करण्यात येत असताना ज्यांच्या त्यांच्या घरी चारचाकी वाहन आहे अथवा शासकीय नोकरी लागली असेल त्यांनी स्वतःहून योजनेतून नाव वगळण्यासाठी अर्ज करावा असे आवाहन महिला व बालविकास अधिकारी जावेद शेख यांनी केले आहे.
पाच एकरपेक्षा अधिक शेती लाभार्थी महिलेच्या कुटुंबाकडे असू नये ही पण अट लाडकी बहीण योजनेत आहे. त्या संदर्भातही आता शासनाकडून तपासणी केली जाणार आहे.
