टीम लोकमन सांगली |
राज्यात अपघाताचे प्रमाण अधिक वाढले आहे. राज्यातील वेगवेगळ्या भागातून अपघाताच्या घटना उघडकीस येत असतात. अशातच आता बलवडी (ता. खानापूर) येथील सांगली- सातारा जुन्या रस्त्यावरील बलवडी फाट्यानजीक चारचाकीने दुचाकीला धडक दिल्याने दुचाकीवरील प्रितंका अनंत पोटे (वय 32, देवराष्ट्रे, ता. कडेगाव) या महिला पोलिस कॉन्स्टेबलचा जागीच मृत्यू झाला आहे. पहाटे साडेपाचच्या सुमारास बलवडी फाट्यावर हा अपघात झाला आहे. याबाबत पोलीस महिलेचा दीर सागर सर्जेराव लोंढे यांनी विटा पोलिसांत फिर्याद दिली आहे.
पोलिसांनी दिलेल्या माहितीनूसार, प्रितंका पोटे या तुरची येथील पोलीस प्रशिक्षण केंद्रात मैदानी खेळाच्या प्रशिक्षक म्हणून कार्यरत होत्या. मंगळवारी पहाटे पाच वाजण्याच्या सुमारास देवराष्ट्रे येथून त्या तुरची येथे पोलीस प्रशिक्षण केंद्राकडे दुचाकीवरुन (MH 10 DH 9906) निघाल्या होत्या. बलवडी फाटा येथे आल्यानंतर चारचाकीची दुचाकीला धडक होऊन अपघात झाला. सकाळी पावणेसहाच्या सुमारास प्रितंका यांचे पती संतोष यांना त्यांचे मित्र अक्षय शिंदे यांनी फोनवरून प्रितंका यांचा बलवडी फाट्यावर अपघात झाल्याचे कळविले. त्यांच्या नातेवाईकांनी तातडीने बलवडी फाट्याकडे धाव घेतली.
दरम्यान प्रितंकांच्या डोक्याला मार लागल्याने त्या जागीच ठार झाल्या. तर पोटे यांच्या दुचाकीसह चारचाकी गाडीचे या अपघातात मोठे नुकसान झाले आहे. विटा पोलिसांनी तातडीने अपघातस्थळी धाव घेऊन घटनेचा पंचनामा केला. प्रितंका पोटे यांचा मृतदेह पलूस येथील ग्रामीण रुग्णालयात शवविच्छेदनासाठी पाठविला. चारचाकी चालक उदय रामचंद्र पवार (वय 36, राहणार रेठरे हरणाक्ष, ता. वाळवा) याच्यावर गुन्हा दाखल करण्यात आल्याचे पोलिसांनी सांगितले.
