टीम लोकमन सांगोला |
डाळिंब वाहतूक करणारी पिकअप जीप व 407 टेम्पोची समोरासमोर जोरदार धडक होवून झालेल्या भीषण अपघातात 2 ऊसतोड कामगारांचा मुत्यू झाला आहे तर 9 महिला व पुरुष ऊसतोडणी कामगार जखमी झाले आहेत. जखमींवर सांगोला येथील खाजगी व ग्रामीण रुग्णालयात उपचार सुरू आहेत.
हा अपघात काल बुधवारी रात्री 9.30 वाजण्याच्या सुमारास सांगोला- मिरज रोडवरील गायत्री मॉल समोर झाला आहे. बाबुराव महादेव गोडसे (वय 42) व एकनाथ सोपान गडदे (वय 53) दोघेही राहणार गौडवाडी ता. सांगोला अशी मृत ऊसतोडणी मजुरांची नावे आहेत. तर सुजाता बापू आलदर (वय 35), रेश्मा संजय ऐवळे (वय 30), विमल भारत कांबळे (वय 55), दामू राजाराम शिंगाडे (वय 60), मैनुहुद्दीन गुलाब मुलानी (वय 70), गोरख लिंगू सरगर, हर्षद हनुमंत काटे (वय 18), हनुमंत श्रीरंग काटे (वय 70), भारत विष्णू कांबळे (वय 65), गणपत दत्तू आलदर (वय 50) सर्वजण राहणार गौडवाडी ता. सांगोला अशी या अपघातात जखमी झालेल्या ऊसतोडणी मजुरांची नावे आहेत.
या अपघातात टेम्पो फरपटत जावून उजव्या बाजूला पलटी झाला त्यामुळे टेम्पोतील उसाच्या वाड्याखाली 11 ऊसतोडणी कामगार अडकले होते. स्थानिक नागरिक मदतीसाठी तात्काळ धावून आले त्यांनी टेम्पो उचलून जखमींना बाहेर काढले व रुग्णवाहिका बोलावून जखमींना उपचाराकरिता रुग्णालयात पाठवले. या अपघातानंतर काही काळ या मार्गावरील वाहतूक खोळंबली होती.
सांगोला पोलीस व स्थानिक नागरिकांच्या मदतीने अपघातग्रस्त वाहने बाजूला करून वाहतूक सुरळीत करण्यात आली. घटनास्थळी पिकअप मधील डाळिंबाचा रस्त्यावर खच पडला होता. तर पिकअप व टेम्पो दोन्ही वाहनांचे या अपघातात मोठे नुकसान झाले आहे.
गौडवाडी ता. सांगोला येथील 5 महिला व 12 पुरुष ऊस तोडणी कामगार कडलास ता. सांगोला शेतकऱ्यांचा ऊस तोडणी करून बुधवारी रात्री 9 च्या सुमारास MH 10 K 6753 या 407 टेम्पोमधून सांगोल्याकडून मिरज रोडने गौडवाडी येथे निघाले होते तर एखतपुर येथून MH 45 AF 6785 या पिकअपमध्ये डाळिंब भरून मिरज रोडने सांगोला येथील पेट्रोल पंपावर डिझेल भरण्यासाठी निघाला होता. वाटेत दोन्ही वाहनांची मिरज रोडवरील गायत्री मॉल समोर समोरासमोर जोराची धडक होऊन हा भीषण अपघात झाला आहे.
