टीम लोकमन मंगळवेढा |
स्नेहसंमेलन म्हणजे कलाविष्कार… स्नेहसंमेलन म्हणजे सुप्त गुणांचे प्रदर्शन… स्नेहसंमेलन म्हणजे निर्मळ आनंद देणारा सोहळा…शाळेच्या मुलांना स्नेहसंमेलनाची एक वेगळीच ओढ आणि आवड असते. म्हणून सर्वच विद्यालयांमध्ये वार्षिक स्नेहसंमेलनाचे आयोजन केले जाते.
मंगळवेढा येथील उदयसिंह मोहिते पाटील इंग्लिश मीडियम स्कूल व संत कान्होपात्रा नर्सिंग कॉलेज यांचे संयुक्त वार्षिक स्नेहसंमेलन गुरुवार दिनांक 30 व 31 जानेवारी 2025 रोजी मोठया उत्साहात साजरे झाले. विद्यालयाच्या परंपरेनुसार विशिष्ठ संकल्पनेवर आधारित स्नेहसंमेलनाचे आयोजन करण्यात आले होते. भावसाक्षरता, वैज्ञानिक दृष्टिकोन, राष्ट्रीय जबाबदारी, ध्येय निश्चिती, निसर्गाबाबतची कृतज्ञता या समाजमन घडवणाऱ्या विषयावर मुलांनी सुंदर सादरीकरण केले.
या वार्षिक स्नेहसंमेलन कार्यक्रमाचे उद्घाटन धनश्री महिला पतसंस्थेच्या संस्थापक चेअरमन प्रा. शोभाताई काळुंगे यांचेहस्ते संपन्न झाले. यावेळी प्रमुख पाहुणे म्हणून मंगळवेढा पंचायत समितीचे प्रभारी गटशिक्षणाधिकारी डॉ. बिभीषण रणदिवे, रोटरी क्लब ऑफ मंगळवेढा सिटीचे व्हाईस प्रेसिडेंट व सुप्रसिद्ध अस्थिरोग तज्ञ डॉ. अरुणकुमार महिंद्रकर, सुप्रसिद्ध बालरोग तज्ञ डॉ. महेश कोनळळी, सिद्ध सारणा संघ माचनूरचे सचिव विष्णू कलुबर्मे,
संत कान्होपात्रा नर्सिंग कॉलेजच्या प्राचार्या शरदिनी काळे, राजपत्रित वैद्यकीय अधिकारी पतसंस्थेचे चेअरमन डॉ. नंदकुमार शिंदे, संत दामाजी मेडिकल फाउंडेशनच्या अध्यक्षा डॉ. पुष्पांजली शिंदे, उदयसिंह मोहिते पाटील इंग्लिश मीडियम स्कूलचे प्राचार्य सुधीर पवार, स्कूल कॅप्टन अथर्व भोसकर व प्रतीक्षा जाधव आदी मान्यवर उपस्थित होते.
कार्यक्रमाची सुरुवात दीपप्रज्वलन व नटराज पूजनाने झाली. प्राध्यापक कल्पेश कांबळे व त्यांच्या चिमुकल्या टीमने स्वागत गीताने सर्व अतिथींचे स्वागत केले. सर्व अतिथींचा प्रशालेकडून यथोचित सत्कार करण्यात आला. कार्यक्रमाचे प्रास्ताविक प्रशालेचे प्राचार्य सुधीर पवार यांनी प्रस्तुत केले. दरवर्षी दिला जाणाऱा उत्कृष्ट विद्यार्थी पुरस्कार यावर्षी इयत्ता सहावीतील कु. सात्विक नागनाथ जाधव व इयत्ता आठवीतील कु. जिया शाकिर सय्यद यांना मान्यवरांच्या हस्ते देण्यात आला. नंतर हाऊस चॅम्पियनशिपची घोषणा करण्यात आली.
ग्रीन हाऊसला शैक्षणिक वर्ष 2024-25 साठी “चॅम्पियनशिप” ट्रॉफी मिळाली. प्रमुख पाहुण्यांनी ग्रीन हाऊसच्या कर्णधारांचा ट्रॉफी देऊन गौरव केला. शोभाताई काळुंगे व डॉ. बिभीषण रणदिवे यांनी विद्यार्थ्यांचे कौतुक करत प्रशालेला वार्षिक स्नेहसंमेलनासाठी शुभेच्छा दिल्या. डॉ. नंदकुमार शिंदे यांनी प्रशालेची भविष्यात असलेली ध्येय पालकांसमोर व्यक्त केली व विद्यार्थ्यांना वार्षिक स्नेहसंमेलनासाठी शुभेच्छा दिल्या.
वार्षिक स्नेहसंमेलनाच्या कार्यक्रमांमध्ये विविधता आढळून आली. त्यामध्ये छत्रपती शिवाजी महाराज थीम, वृद्धाश्रम थीम, हॉरर थीम, शेतकरी थीम, मदर थीम, आसामी लोकनृत्य, बॉलीवूड रिमिक्स, कोळी नृत्य, दक्षिण भारतीय शैली, झोम्बी आणि महाकाली नृत्य, देशभक्तीपर नृत्य, पंजाबी नृत्य आणि गजर माऊलीचा (वारी थीम नृत्य) अशा विविध थीम विद्यार्थ्यांनी सादर केल्या.
दोन दिवसांच्या या कार्यक्रमाला पालकांचा उत्तुंग प्रतिसाद लाभला. पालकांनी विद्यार्थ्यांवर व शालेय व्यवस्थापनेवर कौतुकांचा वर्षाव केला. हा कार्यक्रम यशस्वी करण्यासाठी प्रशालेचे विश्वस्त डॉ. नंदकुमार शिंदे व डॉ. पुष्पांजली शिंदे यांचे मार्गदर्शन लाभले. सर्व शिक्षक, पालक, शिक्षकेतर कर्मचारी यांनी हा कार्यक्रम यशस्वीरित्या पार पाडण्यासाठी परिश्रम घेतले. वंदे मातरम ने कार्यक्रमाची सांगता झाली.
