टीम लोकमन पंढरपूर |
पंढरपूर-टेंभुर्णी मार्गावरील भटुंबरे गावच्या हद्दीत पंढरपूर शहरापासून सुमारे दोन किलोमीटर अंतरावर खाजगी बस आणि मालवाहतूक ट्रक यांच्यात रविवारी सकाळी भीषण अपघात झाला. या अपघातामध्ये दोन भाविकांचा जागीच मृत्यू झाला असून अन्य सहा ते आठ भाविक जखमी झाले आहेत.
जखमी भाविकांना सामान्य रुग्णालयात उपचारासाठी दाखल करण्यात आले आहे. अपघातग्रस्त बस ही पुणे जिल्ह्यातील असून मयत भाविक मावळ तालुक्यातील आहेत. अशी प्राथमिक माहिती पोलीस प्रशासनाकडून देण्यात आली आहे.
पंढरपूर-टेंभुर्णी मार्गावरील पंढरपूर शहरापासून सुमारे दोन किलोमीटर अंतरावर भटुंबरे गावच्या हद्दीत रविवारी सकाळी साडेसहा वाजण्याच्या सुमारास हभप तुकाराम खेडलेकर महाराज मठाच्या समोर हा भीषण अपघात झाला आहे. टेंभुर्णीकडून पंढरपूरकडे येत असलेल्या भाविकांची बसची पंढरपूरकडून टेंभुर्णीकडे निघालेल्या मालवाहतूक ट्रकसोबत समोरासमोर धडक झाली. या अपघातात बस आणि मालवाहतूक ट्रकच्या समोरच्या भागाचा चक्काचूर झाला आहे.
बसमधील दोन प्रवाशांचा जागीच मृत्यू झाला असून अन्य जखमींना उपचारासाठी रुग्णालयात दाखल करण्यात आले आहे. दोन्ही वाहनांचा अपघात झाल्यानंतर या मार्गावरील वाहतूक काही काळ विस्कळीत झाली होती. या अपघाताचे वृत्त समजतात तालुका पोलीस ठाण्याचे पोलीस निरीक्षक मुजावर आणि इतर पोलीस घटनास्थळी दाखल झाले. स्थानिक नागरिकांचे मदतीने दोन्ही अपघातग्रस्त वाहने बाजूला काढून जखमींना उपचारासाठी रुग्णालयात हलवण्यात आले आहे.
