टीम लोकमन मंगळवेढा |
राज्यभर ईव्हीएम मशीनवर विरोधक आक्षेप घेत असतानाच आता मारकडवाडी येथे 3 डिसेंबर रोजी बॅलेट पेपरवर चाचणी मतदान करण्याची मागणी मतदारांनी केली आहे. एकाबाजूला राज्यात झालेल्या दारुण पराभवानंतर महाविकास आघाडीचे सर्व नेते EVM मशीनवर आक्षेप घेत आहेत. तर दुसरीकडे सोलापूरच्या माळशिरस तालुक्यातील मारकडवाडी गावाने आता थेट बॅलेट पेपरवर मतदान घेण्याचा निर्णय घेतल्याने राज्याच्या राजकीय वर्तुळात खळबळ उडाली आहे.
माळशिरस तालुक्यातील या गावात आजवरच्या निवडणुकीत राष्ट्रवादी काँग्रेसच्या शरद पवार गटाचे उत्तम जानकर यांना मोठे मताधिक्य मिळत आले आहे. पण यावेळी विरोधी भारतीय जनता पार्टीचे उमेदवार राम सातपुते यांना मताधिक्य मिळाल्याने जानकर गटाने स्वखर्चाने गावात बॅलेट पेपरवर मतदान घेण्याचा निर्णय घेतला आहे. यासाठी या गावाने माळशिरस तहसीलदार याना निवेदन देत शासकीय कर्मचारी देण्याबाबत पत्र दिले आहे.
बॅलेट पेपरवर चाचणी मतदान घेण्याचा ठराव
या निवेदनात मौजे मारकडवाडी मधील चाचणी निवडणूक घेण्यासाठी शासकीय कर्मचारी मिळावेत अशी मागणी केली आहे. यामध्ये गावात यावेळी झालेल्या मतदानात राष्ट्रवादी काँग्रेस शरदचंद्र पवार पक्षाचे उमेदवार उत्तम जानकर यांना केवळ 843 मते तर विरोधी भारतीय जनता पार्टीचे उमेदवार राम सातपुते यांना 1003 मते मिळाल्याचे सांगितले आहे. यापूर्वी झालेल्या 2009, 2014, 2019 या विधानसभा निवडणूका आणि पाच महिन्यापूर्वीच झालेल्या लोकसभा निवडणुकीत गावातील 80 टक्के मतदान जानकर यांच्या गटाला झाल्याचे पुरावे जोडण्यात आले आहेत.
यावेळी निवडणुकीत मोठे घोटाळे झाल्याचा आक्षेप घेत हे तपासण्यासाठी पुन्हा 3 डिसेंबर रोजी बॅलेट पेपरवर चाचणी मतदान घेण्याचा ठराव गावाने केला आहे. यासाठी शासकीय कर्मचारी मिळावेत अशी मागणी करीत संपूर्ण खर्च भरण्यास गाव तयार असल्याचे निवेदन तहसीलदारांना देण्यात आले आहे.
या बॅलेट पेपरवरील मतदानासाठी गावात फलक लावून मतदानाप्रमाणे सर्व प्रक्रिया घेतली जाणार आहे. यासाठी लागणाऱ्या मतपत्रिका छापण्यास दिल्या असून गावातील प्रत्येकाने आपण या निवडणुकीत ज्याला मतदान केले त्यालाच मतदान करण्याचे आवाहन केले जाणार आहे. वास्तविक या निवडणुकीत मोहिते पाटील व उत्तम जानकर हे दोन कट्टर विरोधक एकत्र आल्याने शरद पवार गटाला 1 लाखापेक्षा जास्त मताधिक्याची अपेक्षा होती.
मात्र निवडणूक निकाल येताच जानकर हे केवळ 13 हजार मताच्या फरकाने शेवटच्या टप्प्यात विजयी झाले. यामुळे उत्तमराव जानकर यांच्या समर्थकांना मशीनवर विश्वास नसल्याची भावना तयार झाली आहे. यातच राज्यातील सर्वच नेते EVM मशीनवर शंका उपस्थित करु लागले आहेत.
विरोधक सहकार्य करणार का?
मारकडवाडी हे राज्यातील पहिले गाव असून ज्या गावाने थेट आता बॅलेट पेपरवर मतदान घेण्याचे पाऊल उचलले आहे. आता या मतदान प्रक्रियेत विरोधी भाजपचे मतदार सामील होणार का? असा प्रश्न देखील उपस्थित होत आहे. या मतदानाचा पुढाकार गावातील एका गटाने घेतल्याने दुसरा गट आता काय भूमिका घेणार हे पाहणे देखील औत्सुक्याचे ठरणार आहे. नक्की काय होणार हे मतदाना दिवशी पाहायला मिळणार आहे. या मतदान प्रक्रियेस शासन स्तरावरून कर्मचारी पुरवणे अशक्य असल्याने ग्रामस्थांनी प्रसिद्धी माध्यमांकडून हि मतदान प्रक्रिया पार पडायची तयारी ठेवली आहे.
यासाठी 3 डिसेंबर रोजी सकाळी 7 ते दुपारी 4 वाजेपर्यंत मतदान होणार आहे. त्यानंतर लगेच 4 नंतर मतमोजणी केली जाणार असल्याची माहिती मिळत आहे. फेरमतदानाची मागणी संपूर्ण गावाने एकमुखी केली असती तर यातून काहीतरी फलित समोर आले असते. मात्र केवळ कमी मताधिक्य मिळाल्याने जानकर गटाने केलेल्या या प्रयोगास गावातील विरोधी गट सहकार्य करणार का? हे पहावे लागणार आहे.
