टीम लोकमन मंगळवेढा |
सोलापूर जिल्ह्यातील मोहोळ विधानसभा मतदारसंघातून विधानसभा निवडणूक लढविण्यासाठी इच्छुक असलेले मोहोळ चे माजी आमदार रमेश कदम यांनी माजी केंद्रीय कृषिमंत्री व राष्ट्रवादीचे अध्यक्ष, ज्येष्ठ नेते शरद पवार यांची भेट घेतली असून मुंबईमधील वाय बी चव्हाण सेंटर येथे उभय नेत्यांमध्ये बैठक संपन्न झाली आहे.
पुढील काही दिवसांमध्ये राज्यात विधानसभा निवडणुकीची आचारसंहिता लागण्याची शक्यता असल्याने राजकीय पक्षांत जागा वाटपाची बोलणी अंतिम टप्प्यात आली आहेत. महाविकास आघाडीत मोहोळ विधानसभेची जागा शरद पवारांच्या राष्ट्रवादीला सुटण्याची शक्यता असल्यानेच मोहोळ विधानसभेसाठी इच्छुक असलेल्या रमेश कदम यांनी शरद पवार यांची भेट घेतली आहे. सध्या मोहोळ विधानसभेचे प्रतिनिधित्व उपमुख्यमंत्री अजित पवार यांच्या राष्ट्रवादीचे यशवंत माने करीत आहेत.
कोण आहेत रमेश कदम?
रमेश कदम हे 2014 साली राष्ट्रवादी काँग्रेसकडून मोहोळ विधानसभा मतदारसंघातून आमदार म्हणून निवडून आले होते. परंतु अण्णाभाऊ साठे महामंडळातील गैरव्यवहार प्रकरणात त्यांना तुरुंगवास भोगाव लागला होता. वर्षभरापूर्वीच कदम कारागृहातून जामिनावर बाहेर आले आहेत. 2019 ची मोहोळ विधानसभा निवडणूक त्यांनी तुरूंगातून लढवली होती. यशवंत मानेंकडून त्यांचा पराभव झाला. तरीही मोहोळ तालुक्यातील जनतेने त्यांना २५ हजारांच्या जवळपास मते दिली होती.
विधानसभा निवडणुकीच्या पार्श्वभूमीवर राजकीय पक्षांमध्ये जागा वाटपासाठी मॅरेथॉन बैठका सुरु आहेत. महाविकास आघाडीमध्ये मोहोळची जागा शरद पवार यांच्या राष्ट्रवादीला मिळण्याची शक्यता असल्यानेच रमेश कदम यांनी उमेदवारीसाठी प्रयत्न सुरू केले आहेत.
शरद पवारांनी रमेश कदम यांना काय सांगितले?
मोहोळ तालुक्यातील काम, गेली वर्षभर जनतेसाठी राबविलेले विविध उपक्रम, आमदार असताना केलेली विकासकामे आदी मुद्द्यांवर कदम यांनी शरद पवार यांना माहिती दिली. जागा वाटपासंबंधी अंतिम चर्चा झाल्यानंतर आणि पक्षातील नेत्यांशी बोलून येत्या काही दिवसांत अंतिम निर्णय घेऊ असे शरद पवार यांनी सांगितले असल्याचे समजते.
