टीम लोकमन मंगळवेढा |
भारतीय जनता पार्टीच्या ज्येष्ठ नेत्या आणि केज विधानसभा मतदारसंघाच्या माजी आमदार संगीता ठोंबरे यांच्या कारवर दगडफेक करण्यात आली असल्याची माहिती समोर आली आहे. या हल्ल्यात माजी आमदार संगीता ठोंबरे आणि कारचे ड्रायव्हर जखमी झाले आहेत. संगीता ठोंबरे यांच्यावर झालेल्या हल्ल्यामुळे मराठवाड्याचे राजकीय वर्तुळात खळबळ माजली आहे.
मिळालेल्या माहितीनुसार, केज तालुक्यातील दहिफळ वड माऊली येथील एका कार्यक्रमासाठी माजी आमदार संगीता ठोंबरे गेल्या होत्या. त्यावेळी त्यांच्या कारवर दगडफेक करण्यात आली. सध्या संगीता ठोंबरे आणि त्यांच्या कारच्या चालकावर उपचार सुरु आहेत. मात्र अचानक माजी आमदार संगीता ठोंबरे यांच्या कारवर दगडफेक का करण्यात आली? याचे कारण अद्यापही समोर आलेले नाही.
पोलिसांनी या प्रकरणाचा तपास सुरु केला आहे. उपलब्ध असलेल्या माहितीनुसार, भाजप नेत्या पंकजा मुंडे यांच्या निकटवर्तीय असलेल्या माजी आमदार संगीता ठोंबरे लोकशाहीर आण्णाभाऊ साठे यांच्या जयंती निमित्त दहिफळ वडगाव येथे गेल्या होत्या.
संगीता ठोंबरे अण्णाभाऊ साठे यांना अभिवादन करून सायंकाळी जात असताना त्यांच्या कारवर दगडफेक करण्यात आली आहे. सध्या केज येथील उपजिल्हा रुग्णालयात माजी आमदार संगीता ठोंबरे आणि त्यांचा कार ड्रायव्हर किशोर बबन मोरे यांच्यावर उपचार सुरू आहेत.
