टीम लोकमन मंगळवेढा |
अजित पवार गटातील महत्वाचे नेते आणि मंत्री छगन भुजबळ सोमवारी अचानक सिल्व्हर ओकवर शरद पवारांची भेट घेण्यासाठी दाखल झाल्याने अनेकांच्या भुवया उंचावल्या होत्या. त्यातच आज राज्याचे उपमुख्यमंत्री अजित पवार यांच्या पत्नी आणि खासदार सुनेत्रा पवार मोदीबागेत दाखल झाल्याने आश्चर्य व्यक्त होत आहे.
शरद पवार आज पुण्यात आहेत. शरद पवार आणि सुप्रिया सुळे मोदीबागेत असतानाच सुनेत्रा पवार तिथे पोहोचल्याने आश्चर्य व्यक्त होताना दिसत आहे.
आज शरद पवार, सुप्रिया सुळे मोदीबागेतील निवासस्थानी असताना सुनेत्रा पवार देखील मोदी बागेत दाखल झाल्या होत्या. तब्बल तासभर सुनेत्रा पवार तिथे थांबल्या होत्या. मात्र यावेळी सुनेत्रा पवार यांनी कोणाची भेट घेतली याबाबत उत्सुकता कायम आहे. जवळपास तासभर तिथे थांबल्यानंतर सुनेत्रा पवार तेथून रवाना झाल्या. यावेळी त्यांनी शरद पवार, सुप्रिया सुळे यांची भेट घेतली का? याबद्दल चर्चा रंगली आहे. दरम्यान सुनेत्रा पवार अजित पवारांच्या बहिणीला भेटण्यासाठी आल्याचेही सांगितले जात आहे. मात्र याबाबत अधिकृत माहिती मिळालेली नाही.
शरद पवार ॲक्शन मोडमध्ये ?
विधान परिषद निवडणुकनंतर शरद पवार ॲक्शन मोडमध्ये आले आहेत. शरद पवार महाराष्ट्र राज्याच्या सहा दिवस दौऱ्यावर असणार आहेत. सोमवारीच शरद पवार पुण्याला रवाना झाले. बुधवारी शरद पवार यांचा पुण्यातील बालगंधर्व येथे कार्यक्रम होणार आहे.
भुजबळांनी शरद पवारांची भेट का घेतली?
भुजबळ आणि पवारांच्या भेटीमुळे राजकीय चर्चांना उधाण आले होते. पवारांची भेट घेतल्यानंतर छगन भुजबळ यांनी पत्रकार परिषेद घेत ही भेट राजकीय नसल्याचे स्पष्ट केले होते. “महाराष्ट्रात ओबीसींना आरक्षण देण्याचे काम तुम्ही राबवले आणि आता राज्यात काही जिल्ह्यात स्फोटक अशी परिस्थिती निर्माण झाली आहे. काही लोक जे आहे ते मराठा समाजाचे हॉटेल असेल तर तिथे जात नाहीत. काही लोक ओबीसी समाजाचे दुकान असेल तिथे मराठा समाज जात नाही. राज्यातील एक ज्येष्ठ नेते म्हणून तुमची एक जबाबदारी आहे. ही शांतता राखली पाहिजे,’ असे भुजबळांनी म्हटले.
भुजबळ पुढे म्हणतात, ‘पवारांचे असे म्हणणे होते की जरांगेंना मुख्यमंत्री भेटले त्यांनी काय चर्चा केली. आश्वासने दिली हे आम्हाला माहिती नाही. तुम्ही हाकेंचे उपोषण सोडायला गेलात तेव्हा त्यांना काय सांगितले याचीही आम्हाला कल्पना नाही. जरांगेंना मंत्री भेटले ते काही माहिती नाही, यावर मी त्यांना म्हटलं की ते तुम्ही मुख्यमंत्र्यांना विचारले पाहिजे. तुम्ही आज राज्यातले ज्येष्ठ नेते आहात. सर्व सामाज घटकांची जिल्ह्या जिल्ह्यात काय परिस्थिती आहे. याचा अभ्यास तुम्हाला जास्त आहे. आम्ही मंत्री, उपमुख्यमंत्री झालो म्हणजे आम्हाला सगळ्याचा अभ्यास आहे असे समजण्याचे कारण नाही. त्यामुळे तुम्ही या बाबतीत पुढाकार घेतला पाहिजे,’ असेही भुजबळांनी म्हटले आहे.
