टीम लोकमन मंगळवेढा |
अमरावती शहरात सिटी बसने चौघांना चिरडल्याची घटना घडली आहे. या अपघातात एका ९ वर्षांच्या चिमुकल्याचा जागेवरच मृत्यू झाला आहे तर तिघे गंभीर जखमी झाले आहेत. अमरवातीच्या सायन्स कोर मैदानासमोर हा अपघात झाला आहे.
या घटनेनंतर संतप्त झालेल्या जमावाने बसची तोडफोड केली आहे. हि घटना आज सकाळी साडे अकरा वाजताच्या दरम्यान घडली आहे. बस ड्रायव्हर घटनास्थळावरून फरार झाला असून सिटी कोतवाली पोलीस ठाण्यात गुन्हा दाखल करण्यात आला आहे.
याबाबत मिळालेली माहिती अशी की, भरधाव वेगात असलेल्या सिटी बसने चौघांना चिरडले असून या अपघातात प्रीतम गोविंद निर्मळे या ९ वर्षांच्या चिमुकल्याचा मृत्यू झाला. तर अपघातात नर्मदा निर्मळे, वैष्णवी संजय निर्मळे आणि संतोष निर्मळे हे गंभीर जखमी झाले आहेत. त्यांची प्रकृती अत्यवस्थ असल्याची माहिती समोर येत असून या तिघांवर जिल्हा रुग्णालयात उपचार करण्यात येत आहेत.
अपघाताच्या घटनेनंतर संतप्त जमावाने बसची तोडफोड केली आहे. एकाच कुटुंबातल्या चौघांना बसने चिरडले असून या परिसरात तणावाचे वातावरण निर्माण झाले आहे. नागरिकांच्या संतापामुळे सायन्सकोर मैदानासमोर पोलीस बंदोबस्त तैनात करण्यात आला आहे.
