टीम लोकमन मंगळवेढा |
उत्तर प्रदेशच्या फतेहपूरमध्ये एका तरुणाला सहावेळा सर्पदंश झाला आहे. फक्त दीड महिन्यात सापाने तब्बल सहावेळा एकाच तरुणाला दंश केला आहे. तरुणाच्या सुदैवाने त्याचा जीव वाचला आहे. आश्चर्य म्हणजे सापापासून आपला जीव वाचवण्यासाठी तरुण पळून आपल्या मावशीच्या घरी गेला होता. यानंतर त्याने काकाचेही घर गाठले होते. पण तरीही सापाने त्याचा पाठलाग काही सोडलाच नाही. सापाने वारंवार त्याच्यावर हल्ला केला. या घटनेमुळे तरुणाच्या नातेवाईकांसह परिसरातील नागरिकांनाही आश्चर्याचा धक्का बसला असून, एकच खळबळ उडाली आहे. या घटनेमुळे त्या तरुणावर उपचार करणारे डॉक्टरही आश्चर्यचकित झाले आहेत.
मलवा पोलीस ठाणे क्षेत्राच्या सारा गावात हा प्रकार घडला आहे. येथे राहणाऱ्या विकास दुबे नावाच्या तरुणाला दीड महिन्यात सापाने एक-दोन नव्हे तर तब्बल 6 वेळा दंश केला आहे. पण त्याच्या सुदैवाने दरवेळी उपचारानंतर तो बरा झाला आहे. सध्याही त्याच्यावर एका खासगी रुग्णालयात उपचार करण्यात येत आहेत. कारण गेल्या दोन दिवसांत सापाने सहाव्यांदा त्याला दंश केला आहे.
विकासने सापापासून आपला जीव वाचवण्यासाठी स्वतःचे घर सोडले आहे. आधी तो आपल्या मावशीच्या घरी पोहोचला होता. पण तिथेही साप पोहोचला आणि त्याला दंश केला. यानंतर तो आपल्या काकांच्या घरी गेला असता सापाने तिथेही त्याचा पाठलाग केला आणि दंश केला. आता विकास आणि त्याच्या कुटुंबीयांना आपण नेमके काय करावे हेच समजत नाही. त्यामुळे हे कुटुंब प्रचंड तणावाखाली आणि भीतीच्या छायेत आहे.
पीडित विकास दुबेने सांगितलं आहे की, गेल्या दीड महिन्यात 6 वेळा सापाने त्याला दंश केला असून दरवेळी तो वाचला आहे. साप दंश करण्याआधी आपल्याला साप हल्ला करणार असल्याचा भास होतो असे त्याचे म्हणणे आहे. या घटनेमुळे त्याच्यावर उपचार करणारे डॉक्टरही आश्चर्यचकित झाले आहेत.
विकासने सांगितलं की, 2 जूनच्या रात्री 9 वाजता बेडवरुन खाली उतरताना सर्वात आधी सापाने दंश केला. यानंतर नातेवाईकांनी त्याला जवळच्या नर्सिंग होममध्ये दाखल केले. उपचारानंतर तो घरी परतला असता 8 दिवसांनी म्हणजेच 10 जूनच्या रात्री दुसऱ्यांदा सापाने त्याला दंश केला. यानंतर पुन्हा एकदा उपचार झाल्यावर तो घऱी परतला. पण यामुळे तो थोडा घाबरला होता. पण हे प्रकरण इथेच थांबणारे नव्हते.
यानंतर पुढील 20 दिवसांत दोन वेळा सापाने त्याला दंश केला. प्रत्येकवेळी उपचारानंतर तो बरा झाला. या घटनेमुळे त्याचे नातेवाईक आणि डॉक्टर सुद्धा आश्चर्यचकित झाले होते. काहींनी त्याला काही दिवस घरापासून दूर जाण्याचा सल्लाही दिला.
घाबरलेल्या विकास रायने सर्वांचा सल्ला ऐकला आणि आपल्या मावशीच्या घरी गेला. पण मावशीच्या घरीही साप पोहोचला. 28 जूनला सापाने मावशीच्या घरी विकासला पाचव्यांदा दंश केला. त्याला पुन्हा एकदा रुग्णालयात दाखल करण्यात आले. यावेळीही तो उपचारानंतर बरा झाला. यानंतर तो काकाच्या घरी राहण्यासाठी गेला. पण तिथेही सापाने पाठलाग करत सहाव्यांदा दंश केला. सध्या त्याच्यावर रुग्णालयात उपचार सुरु आहेत. त्याची प्रकृती चांगली नसल्याचे सांगितले जात आहे. पण या घटनेमुळे त्याचे कुटुंबीय प्रचंड तणावाखाली असून भीतीच्या छायेत वावरत आहे.
