टीम लोकमन मंगळवेढा |
आमदार समाधान आवताडे यांनी नुकतीच पंढरपूर मंगळवेढा मतदारसंघातील दूध उत्पादक संस्थाचे चालक व दूध उत्पादक शेतकऱ्यांची विचार विनिमय बैठक घेऊन त्यांच्या समस्या जाणून घेतल्या व दुध दरवाढीसंदर्भात मुख्यमंत्र्यांना भेटून तुमच्या सर्व मागण्या त्यांच्यासमोर मांडणार असल्याचे आश्वासन दिले होते.
त्यानुसार आमदार आवताडे यांनी गुरुवारी सकाळी राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, दुग्धविकास मंत्री राधाकृष्ण विखे-पाटील यांची भेट घेऊन उत्पादक शेतकरी व संस्थाचालकांच्या मागण्यांचे पत्र दिले असता या विषयासंदर्भात तात्काळ बैठक लावण्याचे आदेश मुख्यमंत्री व उपमुख्यमंत्र्यांनी राज्याचे महसूलमंत्री तथा दुग्धविकास मंत्री राधाकृष्ण विखे-पाटील यांना दिले. दुग्धविकास मंत्र्यांनी शनिवारी दि. 29 जून रोजी सायंकाळी पाच वाजता त्यांच्या दालनात बैठक आयोजित केली असल्याची माहिती आमदार आवताडे यांनी दिली.
आमदार आवताडे यांनी मंत्री महोदयांना दिलेल्या निवेदनात म्हटले आहे की, मागील तीन महिन्यात तापमानात झालेली प्रचंड वाढ, पडलेला दुष्काळ, यामुळे अत्यंत प्रतिकूल परिस्थितीमध्ये दूध उत्पादक शेतकरी जनावरांचे पालन पोषण करीत आहेत. मात्र त्यांच्या दुधाला योग्य दर मिळत नसल्यामुळे शेतकरी अडचणीत सापडले आहेत. त्यांना यातून बाहेर काढण्यासाठी पुढील मागण्या मान्य कराव्यात.
यामध्ये दूध दर कपात व दूध दरवाढ यावर शासनाचे नियंत्रण असले पाहिजे, राज्यातील दूध उत्पादक शेतकऱ्यांना उत्पादन खर्चापेक्षा कमी दर मिळत असल्यामुळे दुधाला प्रति लिटर सात रुपये अनुदान देणे, दुधाच्या दराबाबत दरवर्षी शासनाने दुधाच्या उत्पादन खर्चावर आधारित एम एस पी व एफ आर पी ठरवण्याबाबत आयोग तयार करणे, दुधाचे उत्पादन पॅकिंग व मार्केटिंग बाबत स्वतंत्र धोरण ठरवणे, दूध व दुग्धजन्य पदार्थातील भेसळवर कडक धोरण राबवणे, शासकीय दूध योजना पुनर्जीवित करण्याकरता विशेष प्रयत्न करणे, म्हशीच्या दुधाच्या उत्पादन खर्च 60 रुपये प्रति लिटर तर गाईच्या दुधाचा उत्पादन खर्च 35 रुपये प्रतिलिटर आहे. म्हणूनच गाईच्या दुधाला 40 रुपये आणि म्हशीच्या दुधाला 70 रुपये असा दर जाहीर करणे.
जनावरांच्या गोठा निर्मितीसाठी एमआरजीएस मधील 60:40 चे धोरण बदलून 95:5 असे करणे, पंढरपुरी म्हशीचे संगोपन करणाऱ्या गवळी समाजास थेट मदत करणे, जनावरांचा विमा शासनाने उतरणे. अशा अनेक मागण्या आमदार आवताडे यांनी निवेदनाद्वारे केल्या असून दूध उत्पादक शेतकऱ्यांना न्याय देण्याची मागणी केली आहे.
त्यासंदर्भात मुख्यमंत्री व उपमुख्यमंत्री यांनी तात्काळ बैठकीचे आदेश दिल्यानंतर उद्या शनिवारी सायंकाळी पाच वाजता महसूल मंत्री तथा दुग्धविकास मंत्री राधाकृष्ण विखे पाटील यांनी या विषया संदर्भात मंत्रालयात दुग्धविकास मंत्रांच्या घालण्यात बैठक लावल्याची माहिती आमदार समाधान आवताडे यांनी बोलताना दिली.
