टीम लोकमन मंगळवेढा |
लोकसभा निडवणूकीच्या निकालानंतर भाजप पक्ष संघटनेत मोठे फेरबदल होण्याचे संकेत आहेत. केंद्रात सरकार स्थापन झाल्यानंतर राष्ट्रीय अध्यक्षांपासून ते राज्य पातळीपर्यंत मोठे बदल होणार असल्याची शक्यता वर्तविण्यात येत आहे.
सध्याचे राष्ट्रीय अध्यक्ष जे. पी. नड्डांचा कार्यकाळ 6 जून रोजी संपणार आहे. यामुळे भाजपला नवीन राष्ट्रीय अध्यक्ष मिळण्याची शक्यता आहे. देशभरातून अनेक नेत्यांची नावे चर्चेत आहेत. त्यात महाराष्ट्रात राज्यातील या नेत्याचे नाव पण आघाडीवर असल्याचे समजते.
जे. पी. नड्डा यांचा कार्यकाळ संपणार
लोकसभेचा निकाल 4 जून रोजी लागणार आहे. तर भाजपचे राष्ट्रीय अध्यक्ष जे. पी. नड्डा यांचा कार्यकाळ 6 जूनला संपणार आहे. त्यानंतर संघटनात्मकदृष्ट्या पक्षात मोठा बदल होण्याची शक्यता वर्तविण्यात येत आहे. राष्ट्रीय अध्यक्ष पदासाठी भाजपचे राष्ट्रीय सरचिटणीस व महाराष्ट्र राज्यातील नेते विनोद तावडे यांच्या नावाची सध्या चर्चा सुरु आहे. तर मध्यप्रदेशचे माजी मुख्यमंत्री शिवराज चव्हाण, भूपेंद्र यादव, धर्मेंद्र प्रधान यांची नावे सुद्धा समोर येत आहेत. महाराष्ट्र राज्यातील भाजप संघटनेत सुद्धा मोठे फेरबदल होण्याची शक्यता वर्तविण्यात येत आहे.
अध्यक्ष बदलला जातो अथवा त्याला मुदत वाढ मिळते…
भाजपातंर्गत दर तीन वर्षांनी राष्ट्रीय अध्यक्ष बदलला जातो किंवा अध्यक्षांना पुन्हा संधी दिली जाते. जे. पी. नड्डा यांचा कार्यकाळ गेल्यावर्षी जून महिन्यात संपला होता. परंतु त्यावेळी त्यांना एक वर्षांची मुदत वाढ देण्यात आली होती. भारतीय जनता पार्टीच्या पक्ष घटनेनुसार अध्यक्षांचा कार्यकाळ संपण्यापूर्वीच नवीन अध्यक्षाची निवड करण्यात येते. त्यामुळे 4 जूनच्या निकालापूर्वी अथवा नंतर नवीन राष्ट्रीय अध्यक्षाची निवड होऊ शकते आणि त्या नावाची घोषणा होऊ शकते.
राज्यातील भाजप नेते विनोद तावडे यांचे नाव पण राष्ट्रीय अध्यक्षपदासाठी चर्चेत आहे. विनोद तावडे भाजपचे राष्ट्रीय अध्यक्ष झाले तर राज्यात नेतृत्व बदलाची शक्यताही वर्तवली जात आहे. यानंतर मात्र राज्यात तावडे पॅटर्न चालणार हे निश्चित.
