टीम लोकमन सोलापूर |
सोलापूरच्या जिल्हा परिषदेच्या माध्यमिक शिक्षण विभागाला पूर्णवेळ लाभलेले शिक्षणाधिकारी सचिन जगताप यांनी शिक्षण विभागाला शिस्त लावण्याचा प्रयत्न सुरू केला आहे. माध्यमिक शिक्षण विभागाच्या कार्यालयातील विस्कटलेली घडी बसवण्याचा ते प्रामाणिक प्रयत्न करीत असून प्रलंबित कामांचा निपटारा करण्यास त्यांनी प्राधान्य दिल्याचे चित्र दिसत आहे.
मागील दोन वर्षापासून जिल्हा परिषदेतील माध्यमिक विभाग हा संपूर्ण राज्यभरात विविध कारणांमुळे चर्चेचा विषय झाला. बोगस दिलेल्या मान्यतांमुळे चौकशी लागली. त्यातच गेल्या दोन वर्षात या विभागाला किमान चार ते पाच शिक्षणाधिकारी लाभले. यामध्ये अनेकांना अतिरिक्त पदभार देण्यात आला. मारुती फडके हे पूर्ण वेळ शिक्षणाधिकारी म्हणून आले होते परंतु ते दबकत दबकत कामकाज करत असल्याने त्यांचा या ठिकाणी काम करण्यात रस नव्हता हे त्यांच्या कामकाजावरून दिसून आले. काही महिन्यातच त्यांनी झेडपीतून काढता पाय घेतला.
यामुळे माध्यमिक शिक्षण विभागाची घडी पुन्हा विस्कटली. अनेक कर्मचारी बदलून गेले आणि आले. त्यामुळे कामकाजात गोंधळ उडत आहे. यातच मागील दोन महिन्यापूर्वी वर्धा येथून शिक्षणाधिकारी सचिन जगताप हे सोलापुरात आले. त्यांनी माध्यमिक शिक्षण विभागाच्या कामकाजाची पद्धत पाहिली असता फारच गोंधळ आणि अनियमितता दिसून आली. त्यामुळे ते सुस्त झालेल्या शिक्षण विभागाला शिस्त लावण्याचा एक चांगला प्रयत्न करीत आहेत. शिक्षकांचे प्रश्न, शिक्षकेतर कर्मचाऱ्यांचे प्रश्न त्यासोबतच शिक्षक संघटनांशी सकारात्मक चर्चा करून कामकाज करताना दिसत आहेत.
यापूर्वी माध्यमिक शिक्षण विभागामध्ये कामकाजाच्या फाईल या थेट संबंधित व्यक्ती हातात देऊन शिक्षणाधिकाऱ्याकडे जाऊन सह्या घेत असायचे. जणू अशीच पद्धत प्रचलित झाली होती. मागील काही दिवसापासून या ठिकाणी काम करणारे लिपिक हे ज्याची फाईल आहे त्याच्याच हातात देऊन शिक्षणाधिकाऱ्याकडे पाठवतात. हे लक्षात आल्यानंतर जगताप यांनी आता थेट कर्मचाऱ्यांना खडे बोल सुनावले आहेत. लिपिकाच्या हातातूनच फाईल माझ्याकडे आली पाहिजे अन्यथा….. यामुळे माध्यमिक शिक्षण विभागाच्या कार्यालयातील लिपिकांनी सुद्धा जगताप साहेबांच्या या कडक व शिस्तप्रिय स्वभावाचा धसका घेतला आहे.
