टीम लोकमन मंगळवेढा |
डॉ. बाबासाहेब आंबेडकर आदर्श प्राथमिक शाळा ढवळस ता. मंगळवेढा या प्रशालेचे मुख्याध्यापक सुर्यकांत बापूराव जाधव यांचा सेवापूर्ती सत्कार समारंभ मंगळवार दिनांक २३ एप्रिल रोजी संपन्न होणार असल्याची माहिती सुर्यकांत जाधव गुरुजी सेवापूर्ती सत्कार समितीच्या वतीने देण्यात आली.
शिक्षण क्षेत्रातील प्रदीर्घ सेवेनंतर सुर्यकांत बापूराव जाधव हे सेवेतून निवृत्त होत आहेत. त्यानिमित्ताने शिक्षक समिती मंगळवेढा व तालुका परिवाराच्या वतीने त्यांच्या सेवापूर्ती सत्कार समारंभाचे आयोजन करण्यात आले आहे. मंगळवार दिनांक २३ एप्रिल रोजी सकाळी १० वाजता जोगेश्वरी मंगल कार्यालय, पंढरपूर-सोलापूर बायपास रोड, मंगळवेढा येथे हा कार्यक्रम संपन्न होणार आहे. सूर्यकांत जाधव गुरुजी हे सध्या डॉ. बाबासाहेब आंबेडकर आदर्श शाळा ढवळस ता. मंगळवेढा येथे मुख्याध्यापक पदावर कार्यरत आहेत. त्यांच्या शिक्षण क्षेत्रातील सेवा कालावधीमध्ये त्यांना अनेक पुरस्कारांनी सन्मानित करण्यात आले आहे. एक आदर्श व्यक्तिमत्व म्हणूनही त्यांच्याकडे तालुक्यामध्ये पाहिले जाते. शांत, संयमी व कर्तव्यदक्ष असलेल्या जाधव गुरुजींनी ज्या ज्या शाळेमध्ये काम केले त्या शाळेचा कायापालट झाल्याचे पहायला मिळते. आतापर्यंत त्यांनी ज्या शाळांमध्ये कर्तव्य बजावले तिथे त्यांनी अतिशय निष्ठेने आणि उत्साहाने कार्यरत राहिल्याने ते विद्यार्थी प्रिय शिक्षक म्हणून ओळखले जातात.
सोलापूर जिल्हा परिषद प्राथमिक शिक्षण विभागाचे उपशिक्षणाधिकारी संजय जावीर यांचे शुभहस्ते व मंगळवेढा पंचायत समितीचे सेवानिवृत्त गटशिक्षणाधिकारी हणमंत कोष्टी यांचे अध्यक्षतेखाली हा सेवापूर्ती सत्कार समारंभ होणार आहे. यावेळी प्रमुख पाहुणे म्हणून प्राथमिक शिक्षक समितीचे सोलापूर जिल्हाध्यक्ष सुरेश पवार, मंगळवेढा पंचायत समितीचे गटशिक्षणाधिकारी पोपटराव लवटे, मरवडे बीटचे शिक्षण विस्तार अधिकारी डॉ. बिभीषण रणदिवे, मंगळवेढा बीटचे शिक्षण विस्तार अधिकारी मल्लिकार्जुन आनंदपुरे उपस्थित राहणार आहेत.
सुर्यकांत बापूराव जाधव यांच्या सेवापूर्ती सत्कार समारंभासाठी मंगळवेढा तालुक्यातील केंद्रप्रमुख, मुख्याध्यापक, शिक्षक व शिक्षणप्रेमी नागरिकांनी मोठ्या संख्येने उपस्थित रहावे असे आवाहन जाधव परिवार, मंगळवेढा तालुका प्राथमिक शिक्षक समिती व तालुका परिवार यांचे वतीने करण्यात आले आहे.
